飛機欖

飛機欖
飛機欖又叫甘草欖，最先出現喺廣州，之後嚟到香港。
甘草欖形似橄欖，用鹽同甘草等藥材醃製造而成，甘草味濃，酸中帶甜，唔易變壞。
喺1950年代至1970年代，甘草欖嘅流動小販斜背著欖型嘅桶，
喺民居嘅街上面沿途叫賣兼唱賣欖歌。
當年嘅唐樓高度有限，只得幾層高，d客人由露台扔錢俾街上面嘅小販，
咁個小販就掟啲甘草欖俾樓上露台嘅人,佢哋訓練有素,好似放飛機仔，
所以就有飛機欖呢個叫法。

喺香港，人稱「飛機欖之父」嘅郭鑒基，佢喺14歲嗰時，由掟石頭得到靈感，
就同三個朋友夾份合夥買入當時流行喺廣州嘅小食「甜欖」，再撈入甘草、陳皮、丁香、玉桂、鹽、糖等香料醃製之後包裝，用獨創「掟上樓」嘅方式銷售。
聽講佢醃製嘅飛機欖酸中帶甜，又唔易變壞，而且甘草有止咳、潤喉等功效，好受街坊歡迎。
喺1970代高峰時期，佢每日做2個鐘頭就掟咗約200份（大約10斤）嘅飛機欖上樓。

賣欖歌（郭鑒基）
咁靚嘅飛機欖，的確係冇得彈。生津止咳，下火又除痰。
若有傷風兼病患，我負責寫包單，你食咗至好行。
想買企定嚟，我飛粒畀你，你唔好眨眼。
好靚嘅夫妻和順欖，包你兩公婆食咗冇得彈