第一收容港

轉載廣東話資料館 Cantonese Museum

第一收容港「香港被出賣」！

越戰喺1961年爆發，至1975年4月30日結束，南越俾北越同越共游擊隊打敗，北越統一越南。
對共產政權感到恐懼嘅人紛紛逃亡。
第一批進入香港嘅難民為數3,743人，佢哋喺5月4日跟著丹麥註冊貨輪「長春號」抵達香港
（當日仲係英女皇喺港展開第一日訪問），全數獲得收容，跟著幾年都有難民抵港。
當時南北越正實施半年嘅自由通行政策，期間有傳言話兩越可能會獨立分治，難民數目仍相對溫和，直至統一已成定局，越共開始展開清洗行動，仲一度廢除南越貨幣，終於引發大規模嘅難民潮 。

 嚟港嘅越南難民愈來愈多，香港政府只好安排佢哋入住難民營。
最初香港政府好天真咁以為其他東南亞國家會分擔香港嘅重負，但係其他國家都唔想收容，將人道嘅假面具除抵，用拖延手段拒絕收容難民。東南亞各國用激烈手段，將啲難民船拖出公海拒絕收容，仲引起翻船導致死亡等不幸事件，因此聯合國難民公署就定出「第一收容港」定義，就係話難民離開越南想去嘅第一個港口，呢個港口就唔能夠拒絕收容。
喺1979年英國就簽署咗呢個第一收容港嘅協議，香港作為佢嘅殖民地於是就自動成為簽署港，香港被終主國出賣。當時英國本土港口亦都拒收難民，直接將責任推到香港。

喺呢個情況之下，其他國家拒收香港嘅難民數目愈來愈多，而能夠移居外國收容嘅數目就愈來愈少，香港可謂有苦自已知；當海上檢疫中心唔能應付咁龐大數目嘅難民後，就迫住要開設青洲島做檢疫中心，收容越南人嘅中心亦不斷增加，喺全盛時期有：廣東道政府船塢、昂船洲、屯門望后石、屯門新益工業大廈、沙田白石營、啟德空軍基地、九龍灣、深水步軍營、亞皆老街軍營、哥連臣角、石崗軍營、西貢萬宜難民營、喜靈洲、芝麻灣、大丫洲等等難民營 。

為了逃避戰亂 ,冒着生命的危險 ,怒海中飘泊來到咗香港的婦孺 ,接受香港有關部門救援 .